Innansveitarkronika eftir H.Laxness

INNAN

SVEITAR

KRONIKA

Innansveitarkronika kom út árið 1970 og er næstsíðasta skáldsagan sem Halldór Laxness sendi frá sér á höfundarferlinum, voru þá liðin rúm fimmtíu ár frá því sú fyrsta kom út. Titillinn vísar til glímunnar við söguformið en kronika er fornt heiti á frásögn sem ekki lýtur sögumanni heldur rekur atburði eins og þeir raunverulega gerðust.

Halldór nýtir sér raunverulega atburði sem gerðust í Mosfellsdalnum frá árinu 1880 og fram á fimmta áratug 20. aldar og spinnur sögu í kringum kostulegar deilur sóknarbarna um kirkjubyggingu að Mosfelli.

Hlusta \ Lesa

„…Vitrir höfundar telja þá hjátrú sprottna af getuleysi að til séu erfið verk; þau ein verk séu erfið sem unnin eru með rángri aðferð. (bls. 36-37).“- ( Innansveitarkronika, 1970 )
„Minn haus liggur á Mosfelli, það er haus Egils Skallagrímssonar sem mosfellsprestar stálu. Sá haus skal aldrei brotna. (bls. 61).“- (Innansveitarkronika, 1970)
„Til dæmis þegar talað var um veður þá var það eitt sjónarmið ráðandi hversu það mætti henta sauðfé. Gott veður var það veður sem var gott fyrir sauðfé. Gott ár var það þegar óx gras handa sauðfé. Fallegt landslag á Íslandi þykir þar sem góð er beit handa sauðfé. (bls. 26).“- ( Innansveitarkronika, 1970 )
„Hafi nokkur kirkja nokkru sinni getað hrópað með nokkrum rétti guð minn hví hefur þú yfirgefið mig, þá er það Mosfellskirkja. (bls. 9).“- ( Innansveitarkronika, 1970 )

Opna bókina

Sagan af brauðinu dýra

Í Innansveitarkroniku er meðal annars að finna „Söguna af brauðinu dýra“ sem gefin hefur verið út sérstaklega í myndskreyttum útgáfum á íslensku, ensku og þýsku. Þar segir frá Guðrúnu Jónsdóttur sem var send með brauð milli bæja en villtist dögum saman í þoku á heiðinni. Ekki snerti hún þó við brauðinu enda sagði hún síðar, samkvæmt því sem stendur í Innansveitarkroniku: „Því sem manni er trúað fyrir, því er manni trúað fyrir.“